Почитувани,
Во врска со вчера објавениот текст во многу интернет медиуми и на телевизија, од кои јавноста очекува објективно и независно информирање, по повод најавената молитвена средба во сабота, досега ниту еден медиум не се обратил до пастор Константин Кајшаров, ниту до Христијанска Црква „Блага Вест“ во РМ, за да проверат, истражат и да ги разјаснат информациите кои ги наведуваат во објавите.
Затоа, на овој начин ја информираме заинтересираната јавност дека пласираните информации и вулгаризми насочени кон личноста и делото на пастор Константин Кајшаров кои поттикнаа низа реакции се неточни и шират расизам и ксенофобија.
Преку неовластена објава на слики и други презентациии голем број на медиуми, како и некои верски организации, преку јавни објави, коментари и интервјуа, промовираа дискриминација и поттикнаа омраза и насилство кон личноста и делото на Константин Кајшаров, врз основа на припадност на маргинализирана група, етничка припадност, јазик, државјанство, социјално потекло, религија и верско уверување, личен и општествен статус, семејна и брачна состојба, имотен статус и здравствена состојба.
Понатаму, Христијанска Црква „Блага Вест“ во РМ е автономна Црква со седиште во Скопје, која со Амалгамски Договор, а не со купена франшиза како што низ клевета пренесоа некои од медиумите, е единствен официјален претставник во Р. Македонија на „Church of God“ Тенеси, Кливленд, САД која е една од најголемите протестантско-харизматски организации во светот. Константин Кајшаров служи во црквата како Пастор и е нејзин Претседател. Тој повикува на богоугоден живот, читање на Библијата и спроведување на вера во дела согласно изворното Библиско учење.
Од друга страна, тој својата професионална дејност од областа на физиотерапијата, како Магистер по кинезитерапија и Магистер по клиничка и советодавна психологија ја врши во своја посебна ординација, одделно и независно од Црквата и просториите на Црквата. Исто така, автор е на 40 книги и 8 музички албуми со христијанска содржина.
Очекуваме извинување од медиумите кои објавија невистини од типот „самопрогласен исцелувач, биоенергичар, познавач на фреквенциите, манипулант, преварант, шарлатан, шејтан…“ и истите да ги отстранат доколку овие термини се употребени поради неинформираност и без намера за изразување навреда. Во спротивно, ќе ги информираме сите релевантни меѓународни организации и ќе бидат покренaти соодветни постапки пред надлежните институции.
Со почит,
Христијанска црква Блага вест во Република Македонија
Веб страница: https://goodnews.mk/
Фејсбук: https://www.facebook.com/goodnews.mk
Јутјуб: https://www.youtube.com/channel/UCOyn0JEgTf-LItICYAWloNQ
