ПРАЗНИЦИ КОИ СЕ СЛАВАТ ВО ХРИСТИЈАНСКА ЦРКВА БЛАГА ВЕСТ
Да бидеме живи Христијани значи да живееме за Бога и со Бога. Во нашето заедништво со Бога ние сме должни да Му служиме Него и да Го славиме и почитуваме во послушност и посветеност. Затоа празниците кои се празнувани од живите Христијани се изразуваат со собирање на верниците во црквата, молитви и славење на Бога, конференции, семинари, концерти, промоција на книги, читање од Библијата. Овие празници се:
Божиќ – Рождество Христово, празник кога сите верници собрани во црквата Го слават Бога и разбираат дека Божјиот Син кој Е уште пред настанокот на светот, се отелотвори на Земјата да ја исполни волјата на Отецот Небесен – спасение на човештвото.
Велигден – Воскресение на Господ Исус Христос – празник кога верниците во црквата Го слават Бога и разбираат што Исус направи на крстот за цело човештво, како умре, беше погребан и на третиот ден воскресна.
Педесетница – Духовден е 50-от ден од Воскресението Христово, денот кога Светиот Дух се спушти на Земјата врз Апостолите и тие беа облечени со сила од Бога за да служат со вера проповедајќи ја Радосната Вест Благата Вест насекаде. Овој ден е роденденот на првата Христијанска Црква, посебно значаен за Христијанската Црква Блага Вест во Р.М. која го следи Библискиот концепт на функционирање.
Денот на Реформацијата – верско-политичко движење насочено против католичката црква коешто го започнал германскиот свештеник Мартин Лутер во 1517 година и завршил со Вестфалскиот мир во 1648. Лутер се противел на политиката на папата на продавање проштални писма за гревовите, наречени индулгенции, како и на некои теолошки сфаќања на католичката црква. Резултат на движењето на Лутер е разбивањето на единството на католичката црква. Тој ги поставил основите на протестантизмот, кој заедно со православието и католицизмот е една од доминантните конфесии во христијанството.
Во текот на овие празници во Христијанска Црква Блага Вест во Р.М. отсуствуваат ритуали и традиционални белези како месење леб со паричка, посна храна, палење оган, бакнување икони, крстење со раце, фарбање јајца, одење по гробишта за Духовден и раздавање на храна, бидејќи сето ова е паганско и не е Библиски оправдано, т.е. Христос и Апостолите сето ова не го правеле.